د هرات بڼ‌وال خپلو حاصلاتو ته له حکومته د بازار غوښتنه کوي — Pajhwok

هرات (پژواک، ۳ چنګاښ ۱۴۰۵): په هرات کې یو شمېر بڼ‌وال د خپلو بڼونو د حاصلاتو پر ډېرېدو خوښي څرګندوي خو د معیاري سړو خونو کمښت، د څاڅکي (قطره‌یي) اوبولګولو له سیسټم سره نابلدتیا او بازارونو ته محدود لاسرسی خپلې عمده ستونزې بولي او د حل غوښتنه یې کوي. د هرات د کرنې، اوبولګولو او مالدارۍ ریاست د معلوماتو له مخې، دغه ولایت د شاوخوا ۴۰۰ زره هکټاره کرنیزې ځمکې او له ۲۸ زره هکټاره د ډېرو مېوه‌لرونکو بڼونو په لرلو سره د افغانستان له مهمو کرنیزو او بڼوالۍ مرکزونو شمېرل کېږي. په دغه ولایت کې د غنمو، زعفرانو، انګورو، انارو، بادامو، زردالو، شفتالو او پستې په ګډون بېلابېل کرنیز محصولات تولیدېږي او زرګونه کورنۍ له همدې لارې خپل ژوند پر مخ وړي. د هرات یو شمېر بڼوال سږ کال د تازه مېوو د حاصلاتو له زیاتوالي خوښ دي د کرخ ولسوالۍ یوه بڼوال عبدالظاهر پژواک ته وویل، سږ کال د هرات هوا د تېرو کلونو په پرتله ډېره ښه وه او همدې چارې یې پر کرنیزو حاصلاتو مثبت اغېز کړی دی. هغه چې پر دوه‌نیم جریب ځمکه د شفتالو، الو او ګیلاس بڼ لري، زیاته کړه چې تېر کال یې تر درې ټنه حاصل ترلاسه کړی و، خو د ده د اټکل له مخې به یې سږ کال حاصلات له پنځو ټنو هم واوړي. نوموړي وویل، که بزګرانو او...