خپلواکي مبارک؛ د اسلامي امارت په واکمنۍ کې (د زمري ٢٨ مې) د… — Bakhtar

Summary: تبصره: د زمري ۲۸مه د افغانستان په تاریخ کې د ویاړ، عزت او ملي خپلواکۍ له مهمو ورځو څخه ده؛ ۱۰۷ کاله وړاندې په همدې ورځ افغان ملت د انګریزي ښکېلاک پر وړاندې د خپلو مبارزو پایله ترلاسه کړه او افغانستان یې د یوه خپلواک هېواد په توګه نړیوالو ته وروپېژاند. خپلواکي یوازې د تاریخ یوه خاطره نه ده، بلکې د ملي حاکمیت، ازادو پرېکړو او د هېواد د برخلیک ټاکلو حق ته ویل کېږي. هر ملت هغه وخت د خپلواکۍ بشپړ احساس کولی شي چې د خپلې خاورې، سیاست او راتلونکي په اړه پرېکړې په خپله وکړي، لکه د اسلامي امارت حکومت چې دغه چاره ترسره کوي. افغانانو د خپل تاریخ په اوږدو کې د خپلواکۍ د ساتنې لپاره درنې قربانۍ ورکړې دي. له انګریزي ښکېلاک سره مبارزه او د شوروي اتحاد او د امریکا په مشرۍ د ناټو پر وړاندې د وروستیو دوو لسیزو بریالی جهاد ټول د همدې اوږدې مبارزې برخې بلل کېږي. د زمري د ۲۸مې ورځې نمانځنې هغه مهال خپل بشپړ مفهوم پیدا کړ، چې هېواد له بهرني پوځي حضور څخه ازاد شو او زه باور لرم، چې د امریکا په مشرۍ د ناټو ځواکونو تر ماتې او وتلو او د اسلامي امارت تر بیا واکمنېدو وروسته د استقلال دغې ورځې (زمري ٢٨) ارزښت لا څرګند شوی دی. په هغه موده کې چې بهرني ځواکونه(امریکا او ناټو) په افغانستان کې موجود وو، د استقلال ورځې نمانځنه د بشپړې خپلواکۍ له مفهوم سره په بشپړه توګه برابره نه وه؛ ځکه د هېواد په مهمو امنیتي او سیاسي برخو کې د بهرنیانو حضور موجود و. خو د امریکا او ناټو تر ماتې او وتلو وروسته افغانستان یو ځل بیا د بشپړ ملي حاکمیت مرحلې ته داخل شوی او اوس د استقلال ورځې نمانځنه د عملي خپلواکۍ له احساس سره یوځای ترسره کېږي. د امریکا په مشرۍ د ناټو ائتلاف ماتې او د شل کلن حضور پای ته رسېدل د افغانستان په تاریخ کې یوه مهمه پېښه ده. دغه تحول د دې سبب شوی چې د زمري ۲۸مه د پخوا په پرتله په لا پراخ مفهوم ونمانځل شي. له همدې امله نن د هېواد په بېلابېلو سیمو کې خلک د خپلواکۍ کالیزه په داسې حال کې نمانځي چې افغانستان له بهرني پوځي حضور څخه بشپړ ازاد شوی او د خپلو چارو د مدیریت واک یې په خپل لاس کې دی. د استقلال ورځې نمانځنه افغانانو ته د دې پیغام هم ورکوي چې خپلواکي یوازې د یوې ورځې جشن نه دی، بلکې د هغې ساتنه، پیاوړتیا او د راتلونکو نسلونو لپاره یې خوندي کول هم یو ملي مسوولیت دی. قوي اقتصاد، علم، یووالی او اغېزمنې ادارې د خپلواکۍ د دوام مهم عناصر ګڼل کېږي. په ټوله کې د زمري ۲۸مې ورځې تاریخي ارزښت نن ځکه لا زیات څرګند شوی چې د امریکا په مشرۍ د ناټو ځواکونو تر وتلو، د اشغال تر پای ته رسېدو او د اسلامي امارت تر بیا واکمنېدو وروسته د استقلال ورځې نمانځنه د بشپړ حاکمیت له احساس سره مله شوې ده. له همدې امله دغې ورځې خپل اصلي ارزښت یو ځل بیا موندلی او افغانان یې نن په ځانګړي ویاړ سره نمانځي.