سرپل کې ۲ ټنه بې ‌کیفیته اوغیر معیاري توکي راټول او وسوځول شول — Bakhtar

Summary: د سرپل ولایت د صنعت او سوداګرۍ ریاست مسوولین وايي چې د تاریخ ‌تېرو او بې ‌کیفیته توکو د راټولولو کمېسیون له لوري د دغه ولایت له بازارونو او هټیو څخه راټول کړل شوي ۲ ټنه بې کیفیته او غیرمعیاري توکي وسوځول شول. د سرپل د صنعت او سوداګرۍ رئیس مولوي عبدالشاکر شهاب باختر اژانس ته وویل، چې په یادو توکو کې ۱۸ قلمه خوراکي او غیرخوراکي توکي، درمل، د پاکولو توکي او بې‌ کیفیته روغتیايي محصولات شامل وو، چې له بازارونو او هټیو څخه راټول او د قانوني کړنلارې له مخې له منځه یوړل شول.نوموړي وویل چې د دې اقدام موخه د خلکو د روغتیا خوندي ساتل، بازارونو ته د بې ‌کیفیته او تقلبي توکو د وړاندې کېدو مخنیوی او د موجودو توکو د کیفیت ډاډمنول دي.ورته مهال مسوولینو له هټیوالو، سوداګرو او ښاریانو وغوښتل، چې د تاریخ‌ تېرو توکو د مخنیوي او د سالم بازار د رامنځته کولو په موخه له اړوندو ادارو سره همکاري وکړي، ترڅو د خلکو روغتیا خوندي او بازارونه له غیرمعیاري توکو پاک وساتل شي.دا په داسې حال کې ده چې د زابل ولایت په مرکز قلات ښار کې هم په ورته یو اقدام کې یو ټن تاریخ تېر او بې کیفیته توکي راټول کړل شوي دي.