نیمروز کې ۴۳ ټانکره بې‌کیفیته تېل بېرته ایران ته مسترد شول — Bakhtar

Summary: د نیمروز ولایت د نفتو او ګازو مدیریت له لوري د وارداتي تېلو له ارزونې، نمونه ‌اخیستنې او کیفیت کنټرول وروسته، ۴۳ ټانکره پټرول او ډیزل بې‌کیفیته تشخیص او بېرته ایران ته مسترد شول. د نیمروز ولایت د نفتو او ګازو عمومي مدیر مولوي نعمت‌الله «طلحه» ویلي، چې دغه ۴۳ ټانکره تېل د موظف پلاوي له لوري د نمونه‌اخیستنې او کیفیت تر ارزونې وروسته بې‌کیفیته تشخیص شوي او بېرته ایران ته مسترد شوي دي. نوموړي زیاته کړې، چې یاد تېل د کنټرول او کیفیت ادارې په لابراتوارونو کې له بشپړې ارزونې وروسته د ټیټ کیفیت لرونکي ثابت شوي، چې له همدې امله بېرته مسترد شوي دي. د نیمروز د نفتو او ګازو عمومي مدیر له ټولو سوداګرو غوښتي، چې شخصي ګټو ته پر ملي ګټو لومړیتوب ورنه کړي، باکیفیته تېل هېواد ته وارد کړي او د بې‌کیفیته تېلو له واردولو ډډه وکړي. هغه ویلي، چې له ایران څخه هېواد ته د واردېدونکو تېلو د کیفیت ارزونې بهیر په جدي توګه روان دی او ټول هغه نفتي توکي به بېرته مسترد شي، چې د ټاکل شویو معیارونو مطابق کیفیت ونه لري. د نیمروز ولایتي ادارې مسوولینو ټینګار کړی، چې هېچا ته به اجازه ورنه کړل شي، څو په ناقانونه توګه یا بې‌کیفیته توکي هېواد ته وارد کړي.