خوست کې د یوه جومات د جوړولو چارې بشپړې شوې — Bakhtar

Summary: د خوست ولایت د اطلاعاتو او کلتور ریاست په انګړ کې د شاوخوا ۲.۳ میلیونه افغانیو په لګښت د یوه جومات د جوړولو او د یوه تالار د ترمیم چارې بشپړې شوې. د باختر اژانس د خبر له مخې، یاد جومات د ستر جهادي شخصیت الحاج مولوي جلال‌الدین حقاني رحمه‌الله په نوم جوړ شوی دی. سرچینې ویلي، چې یاد جومات د اطلاعاتو او کلتور وزارت له پراختیایي بودیجې څخه د ٢.١ میلیون افغانیو په لګښت په یوه پوړ کې جوړ شوی، چې د لمونځ کوونکو لپاره د مناسب ځای ترڅنګ د اوداسه ځایونه او تشنابونه هم لري. همداراز، د «عمر ثالث» رحمه‌الله په نوم د تالار د ترمیم په چارو کې د تالار رنګول، د څوکیو او کوچونو برابرول او د فرش هوارول شامل دي. د دغه تالار د ترمیم لګښت شاوخوا ۲۰۰ زره افغانۍ ښودل شوی، چې د اطلاعاتو او کلتور ریاست له خپلې بودجې څخه ورکړل شوی دی. د یادونې وړ ده، چې د دغو پروژو په بشپړېدو سره د خوست د اطلاعاتو او کلتور ریاست کارکوونکو او مراجعینو ته د عبادت او ناستې لپاره مناسب او منظم ځایونه برابر شوي دي.