متقي عراقچي ته د خور د مړینې له امله تسلیت ووایه

د افغانستان د بهرنیو چارو وزیر امیرخان متقي د ایران د بهرنیو چارو وزیر سید عباس عراقچي د خور، بدرالسادات عراقچي، د مړینې له امله نوموړي او د هغه کورنۍ ته د خواخوږۍ پیغام استولی دی. د متقي په پیغام کې د عراقچي د خور مړینه «دردناکه ضایعه» بلل شوې او د ایران د بهرنیو چارو وزیر، د هغه کورنۍ او د مرحومې پاتې کسانو ته پکې ژوره خواخوږي او همدردي څرګنده شوې ده. متقي ویلي: «زه په دې غم کې خپلې ژورې خواخوږۍ، همدردۍ او غمشریکۍ، له خپلو همکارانو سره یوځای، ستاسو درانه حضور، د کورنۍ نورو غړو او محترمو پاتې کسانو ته وړاندې کوم.» هغه له لوی خدایه د مرحومې لپاره د الهي رحمت او مغفرت او د عراقچي او د هغه د کورنۍ لپاره د جمیل صبر او ستر اجر غوښتنه کړې ده.