بغلان کې د ۱۷ میلیونه افغانیو په لګښت د څلورو سړکونو د کانکرېټ‌… — Bakhtar

Summary: د بغلان ولایت په مرکز پلخمري ښار کې د ۱۷ میلیونه افغانیو په لګښت د څلورو فرعي سړکونو د کانکرېټ‌ کولو چارې پیل شوې. د پلخمري ښاروال مولوي عبدالغفور سیرت باختر اژانس ته ویلي، چې په دغه پروژه کې د بغلان د استخباراتو ادارې مخې ته سړک، د دارالمعلمین سړک، د بند برق له لومړي پله څخه د نساجۍ کلب پورې سړک او د کلیو بیارغونې او پراختیا سړک شامل دي. د نوموړي په وینا، د یادو سړکونو ټول اوږدوالی یو زر ۵۰۰ متره دی او د جوړولو چارې به یې په څلورو میاشتو کې بشپړې شي. هغه د ښاري خدمتونو د ښه والي په موخه د نورو ټولګټو پروژو د پلي کېدو ډاډ ورکړ او ویې ویل، چې د یادې پروژې د تطبیق له بهیر او د معیارونو له رعایت څخه به څارنه وکړي. په همدې حال کې، د پلخمري ښار یو شمېر اوسېدونکو د یادې پروژې د چارو د پیل هرکلی کړی او ویلي یې دي، چې تر دې وړاندې د یادو سړکونو د خرابوالي له امله د تګ راتګ پر مهال له ګڼو ستونزو سره مخ وو.