پاکستان: له ایران سره يې د شخړې پر کمولو هوکړه کړې
- د دواړو هېوادونو بهرنیو چارو وزیران سره غږېدلي
- پاکستان ډاډ ورکړی چې نوره شخړه نه غواړي
- د ديپلوماتیکو اړیکو بېرته رغولو هوکړه شوې
- پاکستان او ایران په امنيتي برخو کې پر نږدې همکاریو سلا شوي
د پاکستان بهرنیو چارو وزارت په یوه وینا پاڼه کې ویلي چې د بهرنیو چارو وزیر جلیل عباس جیلاني د ایران بهرنیو چارو له وزیر امیر حسن عبدالهیان سره په اړیکو کې د شخړې پر کمولو هوکړه کړې.
د خبرپاڼې له مخې دوی دوی د موضوعاتو د سولهييز حل او همکاریو په تړاو غږېدلی او په امنيتي چارو کې یې د لا نږدې همکارۍ ژمنه کړې.
دغه وزارت دا هم ویلي چې د بهرنیو چارو وزیر يې د ترکيې د بهرنیو چارو له وزیر سره په دې اړه هم غږېدلی او ورته ويلي يې دي چې پاکستان نه غواړي شخړه غټه شي او د برید موخه یې یوازې د پاکستان د مخالفینو په نښه کول وو.
دواړو لورو له دې وړاندې ديپلوماتیکې اړیکې هم ځنډولې وې. پاکستان په خپله خاوره د ایران له برید وروسته له تهرانه خپل سفیر ور غوښتی و او اسلام آباد ته يې د تهران د سفیر د نه ور ستنېدو هم ویلي وو. خو اوس د پاکستان د بهرنیو چارو وزارت وايي، د دغو اړیکو او راشې درشې په ښه کولو بېرته سلا شوي.
