کرنې وزارت: سږ کال د هېواد په کچه څه باندې پنځه میلیون مټریک… — Pajhwok

کابل (پژواک) – د کرنې، اوبولګولو او مالدارۍ وزارت وایي، سږ کال په ټول هېواد کې ۵.۱۵ میلیونه مټریک ټنه غنم راټول شوي چې د تېر کال په پرتله ۱۳.۴ سلنه زیاتوالی ښيي. د کرنې، اوبولګولو او مالدارۍ وزارت نن په یوه خبرپاڼه کې ویلي چې د دغه وزارت د کرنیزې احصایې او معلوماتو د تنظیم ریاست د شمېرو له مخې، روان کال په ټول هېواد کې ۵.۱۵ میلیونه مټریک ټنه غنم راټول شوي چې د تېر کال په پرتله ۱۳.۴ سلنه زیاتوالی ښيي. سرچینه زیاتوي، د دغو شمېرو له مخې، روان کال په هېواد کې پر ۱.۹۷ میلیونه هکټاره ځمکه غنم کرل شوي چې د تېر کال په پرتله ۴.۱ سلنه زیاتوالی ښيي. له دې ډلې ۱.۳۴ میلیونه هکټاره اوبیزه او ۶۲۵ زره هکټاره للمي ځمکه وه. خبرپاڼه کې راغلي، له دې سره سره په روان کال کې د هېواد د غنمو مصرفي اړتیا ۷.۰۹ میلیونه مټریک ټنه اټکل شوې ده. په هېواد کې د ۵.۱۵ میلیونه مټریک ټنه غنمو تولید ته په پام سره د بازار د اړتیاوو یوه برخه د وارداتو له لارې پوره کېږي. د کرنې وزارت ویلي چې تېر کال په هېواد کې پر ۱.۸۹ میلیونه هکټاره ځمکه غنم کرل شوي وو او د دغه محصول ټولیز تولید ۴.۵۴ میلیونه مټریک ټنو ته رسېدلی و.