در شماری از وزارت‌ها، ادارات و ولایت‌ها تقرری‌های جدید صورت گرفته‌است — Pajhwok

کابل (پژواک، ۳۱ سرطان ۱۴۰۵): براساس حکم تازهٔ رهبر امارت اسلامی، در شماری از وزارت‌ها، ولایت‌ها و ادارات تقرری‌های جدید صورت گرفته‌است. ذبیح‌الله مجاهد، سخنگوی امارت اسلامی در صفحهٔ ایکس خود نوشته‌است که قاری محمداسماعیل راسخ، قوماندان پیشین امنیهٔ ولایت جوزجان، به‌عنوان والی این ولایت، ملا عبدالکریم نافذ، معاون پیشین قول‌اردوی ۲۱۷ عمری، به‌عنوان قوماندان امنیهٔ جوزجان، ملا عبدالله سرحدی، والی پیشین جوزجان به‌عنوان معاون قول‌اردوی ۲۱۷ عمری و شیخ عبدالرحمن طیبی، رئیس پیشین پوهنتون کندهار، به‌عنوان معین امور فرهنگ و هنر وزارت اطلاعات و فرهنگ تعیین شده‌اند. وی نوشته‌است که همچنان شیخ عبدالرحمن غزنوی، عضو پیشین ریاست دارالافتای ستره محکمه، به‌عنوان رئیس پوهنتون کندهار و مولوی عتیق‌الله عزیزی، معین پیشین امور فرهنگ و هنر وزارت اطلاعات و فرهنگ، به‌عنوان رئیس اطلاعات و فرهنگ هرات گماشته شده‌اند.