افغانستان با بیش از ۲۰۵ هزار بازدیدکنندهٔ تجارتی در صدر فهرست اوزبیکستان قرار… — Pajhwok

کابل (پژواک، ۲ اسد ۱۴۰۵): رسانه‌های اوزبیکستانی گزارش داده‌اند که در شش ماه نخست سال جاری میلادی، بیش از ۲۰۵ هزار شهروند افغانستان با هدف تجارت به اوزبیکستان سفر کرده‌اند و افغانستان در صدر فهرست بازدیدکننده‌گان تجارتی این کشور قرار گرفته‌است. رسانهٔ «کون.اوز» به نقل از کمیتهٔ ملی احصائیهٔ اوزبیکستان گزارش داده‌است که در شش ماه نخست سال ۲۰۲۶، در مجموع ۲۲۸ هزار و ۶۱۵ شهروند خارجی با هدف تجارت به اوزبیکستان سفر کرده‌اند. بر اساس این گزارش، ۲۰۵ هزار و ۹۳۷ شهروند افغانستان در این مدت به منظور انجام فعالیت‌های تجارتی وارد اوزبیکستان شده‌اند که بیشترین شمار بازدیدکننده‌گان تجارتی را در میان شهروندان سایر کشورها تشکیل می‌دهند. در ادامهٔ این فهرست، ترکمنستان با ۱۶ هزار و ۳۲۲ تن در جایگاه دوم و تاجیکستان با چهار هزار و ۳۲۰ تن در جایگاه سوم قرار دارند. آمار کمیتهٔ ملی احصائیهٔ اوزبیکستان همچنین نشان می‌دهد که در این مدت، ۶۲۸ شهروند قرغیزستان، ۳۱۱ شهروند قزاقستان، ۲۳۰ شهروند روسیه و ۱۸۸ شهروند ترکیه نیز با هدف تجارت به اوزبیکستان سفر کرده‌اند. بربنیاد این آمار، شمار بازدیدکننده‌گان تجارتی از سایر کشورهای جهان در مجموع ۶۷۹ تن بوده‌است.