د کابل د دشت برچي په سیمه کې چاودنې ۵۲ تنه ټپیان کړي

د کابل ښار د دشت برچي په سیمه کې د شمع هدایت په نوم په یوه خصوصي ښوونځي کې د لاسي بم چاودنې له امله لږ تر لږه ۵۲ تنه ټپیان شوي دي. د سرچینو په وینا، د ټپیانو ډېری برخه د دغه ښوونځي زده‌کوونکي دي. ټپیان د علي‌جناح، امام زمان، عالمي او ایمرجنسي روغتونونو ته انتقال شوي دي. د ښوونځي یوه ټپي زده‌کوونکي ویلي، لاسي بم له یوه زده‌کوونکي سره و او د هغه په لاس کې وچاودېد. د طالبانو حکومت هم پېښه د لاسي بم چاودنه بللې، خو تر اوسه یې د چاودنې د څرنګوالي، لامل او د لاسي بم د ځای پر ځای کېدو په اړه بشپړ معلومات نه دي خپاره کړي. تر دې دمه د پېښې له امله د مرګ‌ژوبلې رسمي راپور نه دی ورکړل شوی. په ورته وخت کې، د ټپیانو وروستی شمېر هم لا په رسمي ډول نه دی تایید شوی او ښايي بدلون پکې راشي.