د ۱۴۰۵ د وږی ۶ – د ۸ بجو خبرونه | آمو ټلویزیون — Amu TV

د پاکستان د بهرنیو چارو وزیر د بریتانیا د بهرنیو چارو له وزیر سره په لیدنه کې یو ځل بیا له افغانستانه د ترهګرو ډلو د ګواښونو په اړه اندېښنه څرګنده کړې ده. اسحاق ډار په دې لیدنه کې ویلي چې دغه ډلې له افغان خاورې د پاکستان سوله او امنیت ګواښي. هغه د افغانستان او پاکستان لپاره د بریتانیا د دولت وزیر سره هم د افغانستان پر وضعیت خبرې کړې دي. له بلې خوا، د طالبانو ویاند له ایندي‌فوکس میډیا سره په خبرو کې ویلي چې طالبان نه غواړي له پاکستان سره جګړه دوام وکړي. هغه همدارنګه ټینګار کړی چې طالبان د پاکستان، سعودي عربستان او ترکیې له پوځي تړونه اندېښمن نه دي.