سراج الدین حقاني: افغانستان کې خلک له ځاني او رواني امنیت څخه برخمن دي

د سرپرست حکومت د کورنیو چارو وزیر، سراج‌الدین حقاني، خوست ولایت ته د خپل سفر پر مهال له ملا امامانو او قومي مشرانو وغوښتل چې د امنیت د پیاوړتیا، د شخړو د حل او د خلکو د عامه پوهاوي د زیاتولو لپاره د طالبانو له ادارې سره همکاري وکړي. هغه وویل چې د امنیت ټینګښت یوازې د طالبانو مسؤلیت نه دی، بلکې «ګډ مسؤلیت» دی. د سرپرست حکومت د کورنیو چارو وزارت ویلي، حقاني دغه څرګندونې په خوست کې د سرپرست حکومت د پولیسو د قوماندانۍ د نوې ودانۍ د پرانیستې په مراسمو کې کړې دي. د دغه وزارت په وینا، هغه له امنیتي مسؤلینو څخه هم غوښتي چې د سرپرست حکومت د مشر هبت‌الله اخندزاده ټول فرمانونه عملي کړي. سراج‌الدین حقاني په دغو مراسمو کې وویل چې په افغانستان کې جګړه پای ته رسېدلې ده. هغه په ورته وخت کې ادعا وکړه چې «خلک له ځاني او رواني امنیت څخه برخمن دي». د سرپرست حکومت د کورنیو چارو وزیر هغه کسان چې له اوسني امنیتي وضعیت څخه خوښ نه دي، «مغرض اشخاص» وبلل او ویې ویل چې دوی هڅه کوي د خلکو ترمنځ اندېښنه او تشویش رامنځته کړي. هغه همدارنګه ادعا وکړه چې په هېواد کې اختلافات او دښمنۍ له منځه تللې دي، امنیت ورځ تر بلې پیاوړی کېږي او په ټول هېواد کې امنیتي پېښې صفر ته راټیټې…