امریکا یو شمېر نیول شوي افغانان پاکستان ته لېږي | آمو ټلویزیون — Amu TV

بلومبرګ راپور ورکړی چې د امریکا د کډوالۍ اداره غواړي په توقیف‌خونو کې ساتل شوي افغانان پاکستان ته ولېږدوي. تمه ده چې دغه الوتنه په راتلونکو اوونیو کې ترسره شي، خو د کسانو شمېر او وروستی مقصد یې لا نه دی روښانه شوی. د افغانانو د ملاتړ بنسټ افغان ایوک ویلي، په نیول شویو کسانو کې د هغو افغانانو خپلوان هم شامل دي چې پخوا یې له امریکايي پوځ سره همکاري کړې ده. ددغه بنسټ په وینا، ځینو کسانو ته پاکستان او ځینو نورو ته افغانستان د احتمالي مقصد په توګه یاد شوی دی. د امریکا او پاکستان چارواکو تر اوسه دغه راپور په رسمي ډول نه دی تایید کړی. ددې پلان په اړه اندېښنې شته چې ښايي پاکستان ته له لېږد وروسته دغه افغانان افغانستان ته واستول شي، په داسې حال کې چې پاکستان د افغان کډوالو د بېرته ستنولو لړۍ هم روانه ساتلې ده.