بادغیس کې د څاه د اوبو له څښلو وروسته ۱۲۰ څاروي له منځه تللي

د بادغیس ولایت د تګاب‌عالم ولسوالۍ په «چاه جلال» سیمه کې ۱۲۰ رأس څاروي د یوه څاه د اوبو له څښلو وروسته مسموم شوي او له منځه تللي دي. د بادغیس امنیه قوماندانۍ ویلي، پېښه تېره ورځ شاوخوا د ماسپښین په درېیو بجو رامنځته شوې ده. د معلوماتو له مخې، د محی‌الدین په نوم یوه مالدار خپل څاروي د یاد څاه له اوبو خړوب کړي وو چې له اوبو تر څښلو وروسته ټول مسموم شوي او مړه شوي دي. امنیتي چارواکو ویلي، د پېښې د اصلي لامل د معلومولو لپاره یې پلټنې پیل کړې دي او تر اوسه د څاه د اوبو د مسمومېدو کره علت نه دی څرګند شوی.