خیبر پښتونخوا کې د ځمکې ښویېدو له امله یوه ښځه مړه او څلور… — Pajhwok

کابل (پژواک) – د خیبر پښتونخوا په شانګله سیمه کې د تنورونو جوړولو لپاره د خاورې کيندنې پر مهال ځمکه ښویېدلې چې له امله يې یوه ښځه مړه او څلور نورې ټپیانې شوې دي. د ډان ورځپاڼې د راپور له مخې، دغه پېښه د پنجشنبې په ورځ (د اکټوبر ۲۲مه) د شانګلې ولسوالۍ په کوزه اوري سیمه کې شوې ده. د سیمې اوسېدونکو ویلي، دغه ښځې د تنورونو او ديګ‌دانونو جوړولو لپاره د خاورې وړلو په موخه يادې سیمې ته تللې وې چې ناڅاپه ځمکه پرې ښویېدلې او تر خاورو لاندې شوې دي. د راپور له مخې،‌د سیمې اوسېدونکو پنځه واړه ښځې له خاورو راایستلې او د پورن ولسوالۍ مرکزي روغتون ته یې لېږدولې دي؛ خو یوې ښځې روغتون ته له رسېدو وروسته ساه ورکړې او څلور نورې تر درملنې لاندې دي.