د بلخ ښاروالۍ له بودجې د نږدې ۱۹۰۰ متره کانال د جوړولو چارې… — Bakhtar

Summary: بلخ کې د ښاروالۍ له پراختیايي بودجې څخه په مزارشریف ښار کې د ۱۸۲۰ مترو په اوږدوالي د اوبو کانال د جوړولو پروژه پیل شوه. یاده پروژه چې لګښت یې ۱۴ اعشاریه ۵ میلیونه افغانۍ ښودل شوی د یو متر په سور او د یو متر په لوړوالي سره جوړېږي.دغه پروژه د نهر ټوپ له سیمې څخه د روضې مبارکې سویل لوري ته غځېږي چې موخه یې د سطحې اوبو مدیریت او د باراني موسمونو پر مهال د رامنځته کېدونکو ستونزو کمول یاد شوي دي.د مزارشریف ښاروالۍ ویاند مصطفی محمدي باختر اژانس سره خبرو کې هیله څرګنده کړې چې د دې کانال له بشپړېدو سره به په دغو سیمو کې د اوبو د راټولېدو او سېلابونو له امله رامنځته کېدونکې ستونزې تر ډېره هوارې شي.د نوموړي په وینا، په روان کال کې به د یاد ښار په کچه د سړکونو قیر کولو، کانکرېټ کولو، د کانالونو جوړولو او نورو بنسټیزو برخو کې ۳۱ پروژې پلې شي.