د ۱۰ زره مېګاواټه برېښنا د تولید پروژې پیل شوې

د افغانستان برښنا شرکت وايي، د ۱۰ زره مېګاواټه برېښنا د تولید د پروژو عملي چارې یې د غزني ولایت او د کابل ولایت د سروبي له سیمو څخه پیل کړې دي. د دې شرکت په وینا، یوه میاشت وړاندې یې په غزني ولایت کې د ۲ زره مېګاواټه او د کابل ولایت په سروبي کې د ۱۰۰ مېګاواټه لمریزې برېښنا د تولید پروژې هم په عملي توګه پیل کړي دي. د دغو پروژو په لومړي پړاو کې د لمریزو تختو د نصب لپاره د ځمکې د هوارولو چارې د پای ته رسېدو په حال کې دي او تمه ده چې په راتلونکو څو ورځو کې بشپړې شي. له هغې وروسته به د پروژو دوهم پړاو په چټکۍ سره پیل شي چې د لمریزو تختو نصب او فعالول به پکې شامل وي. د پاتې ۷۹۰۰ مېګاواټه برېښنا د تولید پروژې به هم ډېر ژر په ټاکل شویو ولایتونو کې پیل شي.