سمنګان کې څه باندې ۱۸ زره مټریک ټنه انګور راټول شوي — Bakhtar

Summary: د سمنګان ولایت د کرنې، اوبولګولو او مالداری ریاست مسوولین وايي، چې سږ کال د دغه ولایت له باغونو څخه څه باندې ۱۸ زره مټریک ټنه انګور راټول شوي دي. د سمنگانو د کرنې ریاست د کرنیزو چارو آمر انجنیر عبدالخلیل کریمي باختر اژانس ته ویلي، چې سږ کال د فیروزنخچیر او حضرت سلطان ولسوالیو په شاوخوا ۱۲۰۰ هکټاره ځمکه کې له بڼونو څخه ۱۸ زره او ۲۴۰ مټریک ټنه انګور ترلاسه شوي دي. د نوموړي په وینا، د طبیعي افتونو، په ځانګړي ډول د ږلۍ ورښت له امله د انګورو حاصلات د تېر کال په پرتله کم شوي؛ خو په ځايي بازارونو کې یې بیه د تېرو کلونو په پرتله لوړه شوې ده. هغه زیاته کړې، چې اوس مهال یو من انګور په ځايي بازارونو کې په ۱۵۰ افغانیو پلورل کېږي او د سمنګان د انګورو له مشهورو ډولونو څخه تایفي، حسيني او کلک عروس دي. ورته مهال، د سمنګان د انګورو بڼوال وايي، چې سږ کال د انګورو کیفیت ښه دی؛ خو طبیعي افتونو یې پر حاصلاتو منفي اغېز کړی دی. د فیروزنخچیر ولسوالۍ یو بڼوال عبدالاسلام ویلي، چې د ږلۍ له امله یې حاصلات کم شوي او د اوسنیو بیو له کچې هم خوښ نه دی. نوموړي له خلکو غوښتي، چې د بهرنیو محصولاتو پر ځای له کورنیو مېوو څخه استفاده وکړي، څو د کورنیو تولیداتو بازار لا وده وکړي. هغه له مسوولینو هم غوښتنه کړې، چې د انګورو د ساتنې لپاره معیاري سړې خونې جوړې کړي، څو بڼوال وکولای شي خپل حاصلات په مناسبه ځای کې وساتي او په مناسب وخت او بیه یې بازار ته وړاندې کړي.