طالبانو د امریکا خبرداری رد کړ

طالبانو افغانستان ته د سفر په اړه د امریکا د وروستي خبرداري په غبرګون کې ویلي چې په ټول هېواد کې امنیت ټینګ دی. د فارس خبري اژانس د خبر له مخې، د طالبانو ویاند ذبیح‌الله مجاهد د امریکا د بهرنیو چارو وزارت د تازه سفر خبرداري ته په غبرګون کې ټینګار کړی چې افغانستان له امنیت او ثبات څخه برخمن دی. هغه ویلي، د هېڅ هېواد وګړي په افغانستان کې له هېڅ ډول امنیتي ګواښ سره نه دي مخامخ. تر دې مخکې امریکا ویلي وو چې د امنیتي اندېښنو له امله یې وګړي باید افغانستان ته سفر ونه کړي. خو طالبان وایي چې په تېرو کلونو کې په افغانستان کې امنیت ټینګ شوی او د بېلابېلو هېوادونو سیلانیان کولای شي په ډاډمنه فضا کې دغه هېواد ته سفر وکړي.