غزني ښار (پژواک، ۵ چنګاښ ۱۴۰۵): د غزني امنیه قوماندانۍ وایي، د کابل–غزني پر لویه لار د میدانوردګو ولایت د سیداباد ولسوالۍ په عزیزکلا سیمه کې د دوو موټرو د ټکر له امله دوه کسان مړه شوي او تر لسو ډېر نور ټپیان دي. د یادې قوماندانۍ په خبرپاڼه کې راغلي چې پېښه تېره شپه ناوخته د ۵۸۰ ډوله مسافروړونکي موټر او یوه «اکوا» موټر د ټکر له امله رامنځته شوې ده. سرچینې زیاته کړې، په دې پېښه کې دوو کسانو خپل ژوند له لاسه ورکړی او تر لسو ډېر ټپیان شوي دي. خبرپاڼه کې د جزییاتو له ورکولو پرته راغلي چې ټپیان د درملنې لپاره نږدې روغتون ته لېږدول شوي دي. د معلوماتو له مخې، ۵۸۰ ډوله مسافروړونکی موټر د میرویس نیکه ترانسپورټي شرکت اړوند دی.
Sources
- Pajhwok — 2026-06-26 04:52:02
د کابل–غزني پر لویه لار ترافیکي پېښې دوه کسان مړه او تر لسو ډېر ټپیان کړل
Original link