ملګرو ملتونو د افغانستان لپاره خپله نوې استازې وټاکله

بنګله دېشۍ ډیپلوماته رباب فاطمه د ملګرو ملتونو د سرمنشي د افغانستان لپاره د ځانګړې استازې او په افغانستان کې د ملګرو ملتونو د مرستندویه ماموریت د مشرې په توګه ټاکل شوې ده. رباب فاطمه په ډیپلوماسۍ، پالیسي جوړونې، وکالت او د نړیوالو پروګرامونو پلي کولو کې له دیرش کلونو څخه زیاته تجربه لري. هغه د روزا اوتونبایوا ځای ناستې شوه چې دنده یې تېر کال سنبله کې پای ته ورسېده. د ملګرو ملتونو د داخلي میکانیزمونو له مخې که چیرې د امنیت شورا کوم غړی په راتلونکو دوو ورځو کې رسمي اعتراض ونه کړي، نو ټاکنه به وروستۍ شي. د پریکړې له وروستي کیدو سره فاطمه به د ماموریت د یوې خورا مهمې دورې په جریان کې د یوناما مشري په غاړه واخلي.