خوست کې لسګونه نظامي وسایط ترمیم او بېرته ګټې اخیستنې ته چمتو شول — Bakhtar

Summary: د خوست د امنیې قوماندانۍ مسوولین وایي، چې د یادې قوماندانۍ د وسایطو د ترمیم ورکشاپ تخنیکي پرسونل د تېرو درېیو میاشتو په موده کې ۲۹۳ نیمه وېجاړ شوي نظامي وسایط ترمیم او بېرته ګټې اخیستنې ته چمتو کړي دي. د یاد ولایت د امنیې قوماندانۍ ویاند طاهر احرار باختر اطلاعاتي اژانس ته ویلي، چې په رغول شویو وسایطو کې رنجر موټر او هاموې ټانکونه شامل دي، چې د تخنیکي ستونزو له امله نیمه فعال یا له کاره لوېدلي وو، خو د ورکشاپ د تخنیکي پرسونل د هڅو په پایله کې ترمیم او بېرته فعال شول. د نوموړي په وینا، له ترمیم وروسته یاد وسایط د خوست امنیې قوماندانۍ اړوندو جزوتامونو ته سپارل شوي، ترڅو د امنیتي دندو د ترسره کولو، ترانسپورټي اړتیاوو د پوره کولو لپاره ترې ګټه واخیستل شي. طاهر احرار زیاته کړه، چې د وسایطو د ترمیم او بیا فعالولو بهیر په دوامداره توګه روان دی، څو شته امکانات په اغېزمن ډول مدیریت، د وسایطو کاري وړتیا لوړه او د امنیتي ځواکونو د فعالیتونو د لا ښه تنظیم لپاره لازمې اسانتیاوې برابرې شي.