ورزشکار افغان رشتۀ اتلتیک در رقابت‌های بین‌المللی مدال نقره گرفت — Pajhwok

کابل (پژواک، ۱۵ میزان ۱۴۰۵): ریاست عمومی المپیک، تربیت بدنی و ورزش افغانستان می‌گوید که الهام‌الدین سراج‌زی، ورزشکار افغان رشتۀ اتلتیک، در بیستمین دور رقابت‌های بین‌المللی «ماراتون کلمبو» به میزبانی سریلانکا، مدال نقره به‌دست آورده است. ریاست عمومی المپیک، تربیت بدنی و ورزش افغانستان امروز در خبرنامه‌ای گفته است که الهام‌الدین سراج‌زی در بیستمین دور رقابت‌های بین‌المللی ماراتون کلمبو، مسافت ۴۲.۱۹۲ کیلومتر را در دو ساعت و ۵۲ دقیقه پیموده و مدال نقره گرفته است. براساس معلومات منبع، در این رقابت‌ها تنها سراج‌زی به نمایندگی از افغانستان اشتراک کرده بود. این ریاست نوشته است که این رقابت‌ها به میزبانی سریلانکا و با اشتراک ورزشکاران ۳۳ کشور، در چهارم اکتوبر آغاز شده و قرار است تا هشتم این ماه ادامه یابد. ماراتون بین‌المللی کلمبو از رقابت‌های دوش در مسافت‌های طولانی است که ورزشکاران در بخش‌های ماراتون کامل، نیمه‌ماراتون و دوش‌های مسافت کوتاه با هم رقابت می‌کنند.