په افغانستان کې دري اعشاریه اوه میلیونه ماشومان له حادې خوارځواکۍ سره مخ دي

زمونږ خبریال راپور راکړی د ماشومانو د ژغورنې صندوق (Save the Children) ویلي چې په ۲۰۲۶ کال کې په افغانستان کې له پنځو کلونو کم عمره شاوخوا درې اعشاریه اوه میلیونه ماشومان له حادې خوارځواکۍ سره مخ دي. دغه بنسټ نن په یوه راپور کې ویلي چې په تېرو څلورو کلونو کې له پنځو کلونو د کم عمره ماشومانو په منځ کې د حادې خوارځواکۍ کچه ۱۴ سلنه لوړه شوې ده. د ماشومانو د ژغورنې صندوق زیاته کړې چې په افغانستان کې له هرو ۱۰ له پنځو کلونو کم عمره ماشومانو څخه یو له حادې خوارځواکۍ سره مخ دی. دغه بنسټ ټینګار کړی چې د بشري مرستو کمېدو روغتیايي خدمتونو ته د میلیونونو کسانو لاسرسی محدود کړی دی. د دغه بنسټ په وینا، د بوديجې د کمښت له امله نږدې ۶۰۰ روغتیايي مرکزونه هم تړل شوي یا یې فعالیت درول شوی چې په پایله کې یې شاوخوا څلور میلیونه کسان اغېزمن شوي دي. د ماشومانو د ژغورنې صندوق وايي، د مرستو له کمېدو وروسته د لنډمهالو بودجو په کارولو سره توانېدلی چې خپل ۱۴ روغتیايي مرکزونه پرانیستي وساتي؛ خو د دغو مرکزونو او نورو روغتیايي خدمتونو راتلونکی لا هم له ګواښ سره مخ دی.