په غزني کې د خلکو په شخصي درې میلیونه افغانۍ لګښت یو پل جوړ شو

د غزني د جاغوري ولسوالۍ په یوه کلي کې د سیمې د اوسېدونکو په شخصي لګښت نږدې درې میلیونه افغانۍ ارزښت لرونکی پل جوړ او ګټې اخیستنې ته سپارل شوی دی. ځايي سرچینو د شنبې په ورځ، ویلي دغه پل د جاغوري ولسوالۍ د علي سعید په کلي کې جوړ شوی دی او د پل پر جوړولو نږدې درې میلیونه افغانۍ لګښت راغلی چې ډېره برخه یې د سیمې یوه اوسېدونکي ورکړې ده. د پل له بشپړېدو سره څو کلي له یوه بل سره وصل شوي او د خلکو د تګ راتګ ستونزه هم هواره شوې ده. د جاغوري ولسوالۍ اوسېدونکو تر دې وړاندې هم لسګونه عامه پروژې له خپلو شخصي امکاناتو تمویل کړې دي.