څو هيوادونو له طالبانو غوښتي چي پر ښځو محدودیتونه لېري کړي — Dw

تیره میاشت په افغانستان کي واک ته دطالبانو د بیا راستنیدو پنځه کاله پوره سول. په دې موده کي، دغي ادارې پر افغانانو په ځانګړې توګه پر ښځو او نجونو یو لړ محدودیتونه لګولي دي؛ هغه تګلاره چي ملګرو ملتونو ورته د «سابندۍ محدودیتونو» اصطلاح کارولې ده. د ملګرو ملتونو د علمي او ​​کلتور سازمان (یونسکو) د شمېرو له مخي، په دې موده کي نږدې ۲،۴ میلیونه نجوني او ځواني ښځي له ثانوي زده کړو څخه بې برخي سوي دي. د چهارشنبې په ورځ، ۴۳ هيوادونو چي د اروپا د ډېرو هيوادونو ترڅنګ لایبریا، متحده عربي امارات، مکسیکو او جاپان هم پکې شامل ول، د یوې اعلامیې په لاسلیک کولو سره له طالبانو وغوښتل چي سمدستي دا بندیزونه او محدودیتونه لیرې کړي. په ملګرو ملتونو کي د فرانسې استازي ژروم بانفو، د هغو ۴۳ هيوادونو په استازیتوب چي یاده اعلاميه یې لاسلیک کړې، وویل: «د ۲۰۲۱م کال له اګست میاشتې راهیسي طالبانو د جنسیت پر بنسټ د جلاوالي تګلاره پلې کړې چي له مخې یې ښځې او نجونې په عملي توګه له عامه ژوند څخه ایستل سوې او زده کړو، روغتیايي خدماتو او کار ته د هغوی لاسرسی سخت محدود سوی دی.» په ملګرو ملتونو کي د فرانسې استازي زیاته کړه: «موږ د طالبانو له خوا د جنسیت پر بنسټ دوامداره او سیستماتیک تبعیض په کلکه غندو.» هغې چي د…