کرزي یو ځل بیا د نجونو د زده‌کړو پر اهمیت ټینګار کړی — Pajhwok

کابل (پژواک) – د افغانستان پخواني ولسمشر حامد کرزي د سولې او پرمختګ لپاره د علم نړۍوالې ورځې په مناسبت، د ټولنې د ثبات، پرمختګ او هوساینې په ټینګښت کې د علم او پوهې پر ارزښت ټینګار کړی او د نجونو پر مخ یې د ښوونځیو او پوهنتونونو د بېرته پرانیستل کېدو غوښتنه کړې ده. د یادونې ده، د ملګرو ملتونو د علمي او کلتوري سازمان له خوا د نومبر لسمه د «سولې او پرمختګ په خدمت کې د علم نړۍواله ورځ» نومول شوې ده. حامد کرزي د دې ورځې په مناسبت ټینګار کړی چې افغانستان هم د نورو بشري ټولنو په څېر علم او پوهې ته اړتیا لري. هغه ویلي: «زموږ هېواد هغه مهال کولای شي د بهرنیانو له احتیاجه خلاص شي، پر خپلو ستونزو بریالی شي او پرمختګ وکړي چې ټولو وګړو ته یې د زده‌کړو او تحصیل یو شان زمینه برابره وي.» پخواني ولسمشر د همدې موخې لپاره یو ځل بیا د نجونو پر مخ د ښوونځیو او پوهنتونونو د دروازو د ژر تر ژره پرانیستلو غوښتنه کړې او ټینګار یې کړی چې افغانستان د علم او پوهې په ګاڼه د خپلو اولادونو په سمبالولو سره پرمختګ او هوساینې ته رسېدای شي.