کندز کې د ۵۰ رواني ناروغانو درملنه وشوه — Bakhtar

Summary: په کندز کې د رواني ناروغانو د درملنې له مرکز څخه ۵۰ تنه ناروغان له بشپړې درملنې وروسته له خپلو کورنیو سره یوځای شول. د یاد مرکز مسوول ډاکټر محمد نواب مهربان باختر اژانس ته وویل، چې یاد ناروغان د مسلکي ډاکټرانو او روزل شویو روغتیايي کارکوونکو تر دوامدارې څارنې او درملنې لاندې وو او د درملنې په موده کې ورته درمل، طبي مشورې او رواني ملاتړ برابر شوی و. په کندز کې د افغاني سرې میاشتې ټولنې څانګې د رواني روغتیا برخې مسوول وویل، چې یاد ناروغان شپږ میاشتې تر درملنې لاندې و او اوس کولای شي له خپلو کورنیو سره عادي ژوند ته بېرته راوګرځي. ورته مهال د یادو ناروغانو یو غړي عبدالستار باختر اژانس ته وویل: «موږ ډېر خوښ یو چې زموږ د کورنۍ غړی بېرته روغ رمټ راستون شو. دا شپږ میاشتې زموږ لپاره سختې وې، خو د مرکز د ډاکټرانو او کارکوونکو له هڅو مننه کوو چې زموږ د ناروغ درملنه یې په ښه ډول ترسره کړه.» د یادونې وړ ده، چې افغاني سره میاشت په کندز ولایت کې د رواني ناروغانو د درملنې ترڅنګ، بېلابېل بشردوستانه او روغتیايي خدمتونه هم وړاندې کوي او د ټولنې د زیانمنو قشرونو د ملاتړ لپاره فعالیت کوي.