غور کې د ښځو د حقونو اړوند سلګونو قضیو ته رسېدنه شوې — Bakhtar

Summary: د غور ولایت د امر بالمعروف او نهی عن المنکر ریاست مسوولین وایي، چې دغې ادارې د ۱۴۰۵ مالي کال په تېرو شپږو میاشتو کې د ښځو د حقونو اړوند نږدې ۳۰۰ قضیو ته رسېدنه کړې ده. د یاد ریاست مطبوعاتي مسوول مولوي محمد عیسی جابر باختر اژانس ته ویلي، چې په دغو قضیو کې اجباري او له قانوني عمر څخه د کم عمر ودونه، د دښمنیو د پای ته رسولو په موخه د ښځو ورکول، د مهر او میراث حقونه، کورنۍ ستونزې او د ښځو د حقونو اړوند نورې موضوعګانې شاملې وې.نوموړي زیاته کړې، چې د دې ریاست محتسبینو هڅه کړې، څو د غور ولایت په مرکز او ولسوالیو کې د ښځو له شرعي حقونو ساتنه وکړي او د هغو چارو مخه ونیسي، چې د اسلامي شریعت خلاف وي.د نوموړي په وینا، د دغو هڅو په پایله کې د ۶۱ هغو اجباري ودونو مخه نیول شوې، چې د نجونو له رضایت پرته د ترسره کېدو په حال کې وو.هغه ویلي، چې د میراث، مهر، کورني تاوتریخوالي او د ښځو د نورو حقونو اړوند ۲۳۸ قضیو ته هم رسېدنه شوې او ټولې یادې قضیې حل او فصل شوې دي.نوموړي ټینګار کړی، چې خلکو په دې برخه کې له یادې ادارې سره همکاري کړې او د امر بالمعروف او نهی عن المنکر ریاست هڅه کوي، څو د ښځو ټول شرعي حقونه خوندي او هغوی ته وسپارل شي.