تېره میاشت کابل کې د سرغړونو له امله د معاملاتو لارښوونې ۱۹ دفترونه… — Pajhwok

کابل (پژواک، ۹ چنګاښ ۱۴۰۵): د عدلیې وزارت وایي چې د غبرګولي میاشتې په اوږدو کې یې په کابل کې د معاملاتو لارښوونې له ۶۳ دفترونو نظارت ترسره کړی چې له ډلې یې د ناقانونه فعالیت او سرغړونو له امله ۱۹ دفترونه تړل شوي دي. د یاد وزارت د خبرپاڼې له مخې، د انسجام عمومي ریاست د معاملاتو لارښوونې او د عریضه‌لیکونکو چارو ریاست، نظارتي پلاوي د معاملاتو لارښوونې نورو متصدیانو ته توصیه کړې چې خپلې کاري نیمګړتیاوې اصلاح کړي او له هر ډول ناقانونه فعالیتونو ډډه وکړي. سرچینه کاږي، دغه‌راز یاد ریاست د همدې مودې په اوږدو کې ۱۳۷ غوښتونکو ته د معاملاتو لارښوونې د فعالیت نوي جوازونه وېشلي او د فعالیت ۷۱ نور جوازونه یې تمدید کړي دي. سرچینه زیاتوي، همدارنګه د تېرې میاشتې په اوږدو کې د معاملاتو لارښوونې ۲۰۸ متصدیانو ته د معاملاتو د وساطت د اصولو او د معاملاتو د ترسره کولو د څرنګوالي په اړه روزنیزې برنامې جوړې شوې او اړینې زده‌کړې ورکړل شوې دي.