څه د پاسه ۱۰۰۰ تنه ځوان منسوبین د عبدالله بن مسعود رض د… — Bakhtar

Summary: د هیواد د بېلابېلو سرحدي ولایتونو څخه ١١٠٠ تنه نوي ځوانان، چې د اسلامي اردو لیکو ته جذب شوي وو، نن د عبدالله بن مسعود رض د جګړه‌يیزو ګډو زده‌کړو قوماندانۍ له ۴ میاشتنیو مسلکي، نظري او عملي زده کړو څخه وروسته د یو لړ مراسمو په ترڅ کې فارغ شول. دغو مراسمو کې د هېواد د وسلوال پوځ لوی درستیز قاري محمد فصیح الدین فطرت د کابل ولایت والي امین الله عبید، د تعلیماتو او پرسونل معینیت مرستیال مولوي باز محمد حمیدي، د دفاع وزارت ګڼ شمېر رئیسانو او نورو مسوولینو ګډون کړی وو. د هېواد د وسلوال پوځ لوی درستیز په یادو مراسمو کې وویل چې :«تاسو د دښمنانو په وړاندې خپله اماده ګي ونیسئ او خپل قوت ورته وښایاست په ټولو برخو کې پوره امادګۍ ونیسئ ترڅو له هر ډول تیري څخه محفوظ واوسئ او له خپلې خاورې څخه دفاع وکړئ».هغه همدارنګه زیاته کړې،:«موږ تل هڅه کړې چې په عصري وسایلو سمبال، تعلیم یافته اردو جوړه کړو، چې الحمدلله اوس مهال یوه خپلواکه اردو لرو، ټولو هغو هېوادوالو ته مې دا پیغام دی، چې په بهر کې اوسي راشئ خپل هېواد ته خپل ارام او عزتمند ژوند وکړئ نور د پردیو په اشارو دلته تخریبي کړنې مه ترسره کوئ او د نورو د ګټو مه ښکار کېږئ.»ورته مهال یادو ځوانانو پوځي نمایشات وړاندې کړل او د هېواد له سرحداتو څخه د دفاع په موخه په بېلابېلو سرحدي سیمو کې خدمت کولو ته چمتوالی وښود، مراسم فارغانو ته د بری‌لیکونو په ورکولو سره پای ته ورسېدل.