یونیسف: په ۵۵ افغان روغتونونو کې روغتیايي خدمات ښه شوي

د ملګرو ملتونو د ماشومانو صندوق (یونیسف) وایي، په افغانستان کې د روزنیزو پروګرامونو او روغتیايي تجهیزاتو له لارې په ۵۵ روغتونونو کې د میندو او نویو زېږېدلو ماشومانو روغتیايي خدمات ښه شوي دي. یونیسف ویلي، د «HIVA» پروژې له لارې د ډاکټرانو، قابلو او نورو روغتیايي کارکوونکو مسلکي وړتیاوې د روزنې، مشورې او څارنې له لارې پیاوړې شوې دي. د دغه بنسټ په وینا، پروژه د اسیا پراختیايي بانک په ملاتړ پلې کېږي او موخه یې د میندو او نویو زېږېدلو ماشومانو روغتیايي خطرونو کمول او روغتیايي خدمتونو ته د هغوی لاسرسی زیاتول دي. په ځینو روغتیايي مرکزونو کې د مسلکي زده‌کړو لپاره ۱۰ کوچني لابراتوارونه هم جوړ شوي دي.