خوست کې غیر قانوني سپکې او درنې وسلې ونیول شوې — Bakhtar

Summary: د خوست ولایت امنیتي مسوولین وایي، چې په تېرو شپږو میاشتو کې د دغه ولایت په مرکز او ۱۲ ولسوالیو کې یو شمېر ناقانونه ساتل شوې سپکې او درنې وسلې او مهمات کشف او ترلاسه شوي دي. د خوست د امنیې قوماندانۍ ویاند طاهر احرار باختر اژانس ته وویل، چې دغه وسلې او مهمات د امنیې قوماندانۍ اړوند د ترهګرۍ پر وړاندې د مبارزې مدیریت د منسوبینو له لوري نیول شوي دي.د نوموړي په وینا، په ترلاسه شویو وسلو او مهماتو کې ۱۷ کلاشینکوفونه، یو راکټ، یوه پیکا، یو ام ۱۶ ټوپک، اووه تومانچې او زرګونه سپکې او درنې مرمۍ شاملې دي.نوموړي زیاته کړې، دغه وسلې او مهمات چې په غیرقانوني توګه ساتل کېدل د خونديتوب په موخه اوس اړوندو ادارو ته سپارل شوي دي.سرچینې دا هم ویلي چې په تړاو یې ځینې کسان نیول شوي او له لومړنیو څېړنو وروسته عدلي او قضايي ارګانونو ته ور پېژندل شوي دي.مسوولین ټینګار کوي، چې د ناقانونه وسلو او مهماتو د راټولولو او د امنیت ټینګښت په موخه به کشفي او عملیاتي اقدامات دوام ولري.