سمنګان کې د یوې ترافیکي پېښې له امله ۱۰ کسانو ته مرګ‌ ژوبله… — Bakhtar

Summary: د سمنګان ولایت د حضرت سلطان ولسوالۍ اړوند سیمه کې د دوو سراچه ډوله موټرو ترمنځ د ترافیکي پېښې له امله ۱۰ کسانو ته مرګ‌ ژوبله اوښتې ده. د یاد ولایت د امنیې قوماندانۍ ویاند حشمت الله رحماني باختر اطلاعاتي اژانس ته وویل، چې دغه پېښه نن غرمه د حضرت سلطان ولسوالۍ په مربوطاتو کې رامنځته شوې، چې له امله یې درې تنه، چې دوه نارینه او یوه ښځه پکې شامل دي، مړه شوي او اووه تنه نور ټپیان دي. د نوموړي په وینا، ټپیان د درملنې لپاره د سمنګان ولایتي روغتون ته لېږدول شوي دي. د سمنګان امنیه قوماندانۍ د لومړنیو معلوماتو له مخې، د پېښې لامل د موټر چلوونکو بې‌احتیاطي ښودلې او زیاته کړې یې ده، چې په دې اړه نورې څېړنې روانې دي. همدارنګه، امنیې قوماندانۍ له ټولو موټر چلوونکو غوښتي، چې د ترافیکي پېښو د مخنیوي لپاره د موټر چلولو پر مهال ترافیکي قوانین او احتیاطي تدابیر مراعات کړي، څو د ورته پېښو مخه ونیول شي.