له افغانستان څخه د وروستي امریکايي سرتېري د وتلو پنځمه کلیزه | آمو… — Amu TV

له نن څخه پينځه کاله وړاندې، په همداسې یوه ورځ جنرال کریس دوناهو، وروستی امریکايي سرتېری له افغانستان څخه ووت. د سنبلې د نهمې نېټې په نیمه شپه د وروستي امریکايي پوځي په وتلو سره، په هېواد کې د متحده ایالاتو شل کلن حضور پای ته ورسېد. که څه هم دې پېښې د متحده ایالاتو په تاریخ کې تر ټولو اوږدې جګړې ته د پای ټکی کېښود؛ خو دا خروج له نیوکو او اندېښنو سره هم مل و، چې په هغو کې د ترهګرۍ بېرته وده او پیاوړتیا شامله ده. له افغانستان څخه د امریکایي ځواکونو وتل وروسته له هغه وشول چې متحده ایالاتو او طالبانو د قطر په دوحه کې یو تړون لاسلیک کړ؛ هغه سند چې د افغانستان د یو شمېر سیاسیونو او کارپوهانو له خوا پرې نیوکې شوې او ځینو طالبانو ته د پخواني حکومت د «تسلیمۍ سند» بللی دی. رسمي احصایې چې د سپینې ماڼۍ له خوا خپرې شوې دي ښيي چې امریکا په افغانستان کې په خپله شل کلنه جګړه کې دوه زره او دوه سوه او اته دېرش سرتېري له لاسه ورکړي او لږ تر لږه یوویشت زره نور امریکایي سرتېري په دې جګړه کې ټپیان شوي دي. دا په داسې حال کې ده چې د افغانستان د پخواني حکومت د امنیتي ځواکونو او ملکیانو د تلفاتو کچه له سل زرو تنو څخه اوښتله….