ملګري ملتونه: د طالبانو سياستونه ثبات ته ګواښ دي — Dw

د ملګرو ملتونو امنیت شورا د چهارشنبې په ورځ د افغانستان د وضعیت په اړه بحث وکړ او د دغه هيواد له پاره د ملګرو ملتونو د سرمنشي د ځانګړي استازي مرستیال د وضعیت په اړه یو مفصل راپور وړاندې کړ. ګانيون یادونه وکړه چي تېره میاشت د واک د ترلاسه کولو د پنځمي کلیزي په مناسبت د طالبانو ادارې «پر ټول هيواد د کنټرول، ټينګ امنیت، د زیربناوو پراختیا او د اقتصادي ثبات له پاره هڅي» د خپلو بریاوو د ثبوت په توګه په ګوته کړې. هغې وویل چي دا پرمختګونه په داسي حال کي رامنځته کیږي چي د افغانانو او نړیوالي ټولني د ژورو اندیښنو په اړه «هیڅ پرمختګ» نه دی سوی. هغې دا اندېښني دا ډول بیان کړې: «پر ښځو او نجونو سخت محدودیتونه، انحصاري حاکميت، د بشري حقونو بحران، او د هغو ترهګرو ډلو دوامداره شتون چي د افغانستان، سیمي او نړۍ سولي او ثبات ته ګواښ دي.» هغې د افغانستان د وضعیت په اړه خپله ارزونه کي وویل چي د طالبانو اداره له کوم جدي سیاسي یا وسله‌وال ګواښ سره مخ نه ده، «خو د هيواد ثبات ته مهم ګواښونه مخ پر زیاتېدو دي، چي تر ډېره حده پخپله د واکمنو چارواکو له سیاستونو سرچینه اخلي.» هغې د بېلګې په توګه په ​​بدخشان کي وروستیو پېښو ته اشاره وکړه او زياته يې کړه چي هلته…