نیمروز کې ۶۱۴ کیلوګرامه نشه‌يي توکي کشف او ترلاسه شوي — Pajhwok

زرنج (پژواک، ۱۳ وږی ۱۴۰۵): د نیمروز امنیه قومانداني وايي چې په دغه ولایت کې یې ۶۱۴ کیلوګرامه بېلابېل نشه‌يي توکي کشف او ترلاسه کړي او په تړاو یې دوه کسان هم نیولي دي. د نیمروز د امنیې قوماندانۍ ویاند مولوي ګل‌محمد قدرت پژواک ته وویل چې امنیتي ځواکونو د دوامداره ګزمو په پایله کې د «مارګو دښتې» په سیمه کې یاد نشه‌يي توکي کشف او نیولي دي. هغه وايي، په نیول شوو توکو کې ۴۴۲ کیلوګرامه تریاک، ۹۶ کیلوګرامه شیشه، ۵۹ کیلوګرامه هیروین او ۱۷ کیلوګرامه کریسټال شامل دي. د نوموړي په خبره، په تړاو یې دوه کسان هم نیول شوي او نیول شوي کسان له نشه‌يي توکو سره یوځای د نشه‌يي توکو پر وړاندې د مبارزې مدیریت ته سپارل شوي دي. قدرت زیاتوي چې په دې پېښه کې یو موټر هم نیول شوی دی.