پنجشېر روان کال د اسلامي امارت د پراختیايي پروژو په لومړیتوب کې دی — Bakhtar

Summary: د پنجشېر ځايي مسوولینو ویلي، چې د اسلامي امارت له لوري سږ کال په دغه ولایت کې د ۹۰۰ میلیونه افغانيو په ارزښت پروژې په پام کې نیول شوې، چې له ډلې یې د ۶۰۰ میلیونه افغانیو په ارزښت د تطبیق په حال کې دي او پاتې په تدارکاتي پروسه کې دي. د پنجشېر د والي ویاند سیف الدین لټون له لوري باختر اژانس سره په شریک شویو مالوماتو کې راغلي، چې د یادو پروژو له ډلې یې ډېری پراختیايي دي، چې په بشپړېدو سره به یې په یاد ولایت کې بنسټیز بدلون رامنځته شي.د لټون په وینا، په یادو پروژو کې ۱۰۰ بستریز روغتون، د ابشار ولسوالۍ د سړک جوړول، د پوهنتون لپاره د لیلیې، جومات جوړول شامل دي.نوموړي ویلي، چې په یاد ولایت سږ کال د همکارو موسسو له لوري د ۱۸ میلیونه ډالرو په ارزښت یو شمېر پروژې د پلې کېدو په حال کې دي.د مالوماتو له مخې، د همکارو موسسو له لوري شاوخوا ۲ میلیونه ډالر د ۵۰ پراختیايي پروژو لپاره، نږدې ۱۰ میلیونه ډالر د روغتیايي او ښوونیزو پروژو لپاره او پاتې برخه د بشري مرستو لپاره ځانګړې شوې ده.د پنجشېر والي تازه په یوه غونډه کې له موسسو غوښتي، چې د دغه ولایت پراختیايي اړتیاوې له لویو ډونرانو سره شریکې کړي او د لا ډېرو بنسټیزو پروژو د جذب لپاره هڅې وکړي.